Sabirabad rayon Mədəniyyət Mərkəzində Bakı Uşaq Teatrı “Günahsız günahkarlar” tamaşasını nümayiş etdirib. Tamaşada rayon ümumtəhsil məktəblərinin müəllim və şagirdləri izləyici qismində iştirak ediblər.

Arzu Soltanın qələmə aldığı müasir dövrün qlobal problemlərindən olan insan alverinə qarşı mübarizədə maarifləndirmə məqsədi daşıyan tamaşa gənclər arasında məşhur olan mafiya oyunu üzərində qurulub. Gənclər yığışıb mafiya oynayırlar və özləri də bilmədən insan alveri ilə məşğul olan mafiyanın qurbanlarına çevrilirlər. Kimisi yüksək gəlirli iş adıyla, kimisi ailə qurmaq pərdəsiylə aldadılıb xaricə aparılaraq fiziki və cinsi istismara məruz qalır, kimisi orqan transplantasiyasının qurbanı olur. Bəs bütün bu oyunları quran kimdir? Mafiyanı kim idarə edir? Mafiyanı kim ifşa edə bilər? Gənclər insan alveri haqqında nələri bilməlidirlər?

Fərqli rejissor həlli ilə “Günahsiz günahkarlar” bütün bu suallara cavab verir.

Sağlam həyat tərzinin təbliği layihəsi çərçivəsində ərsəyə gələn bu tamaşa şagirdlərin böyük marağına səbəb oldu.