Qaratəpə kənd tam orta məktəbdə Novruz bayramına həsr olunan təntənəli tədbir keçirilib.

Tədbirin keçirilməsinin məqsədi Novruz bayramında xalqımızın milli adət-ənənələrinin gələcək nəsillərə ötürülməsinin və milli mənəvi dəyərlərimizin qorunub saxlanılmasının vacibliyini şagirdlərin diqqətinə çatdırmaqdır.

Məktəbin direktoru Gülnar Hüseynova iştirakçıları təbrik edib, əsrlərin sınağından çıxmış mənəvi dəyərlərimizi, adət-ənənələrimizi özündə yaşadan Novruz bayramının insanlar arasında birliyin və mehribanlığın möhkəmləndirilməsi, onların bir-birinə mərhəmət və diqqət göstərməsi kimi sağlam təməlli bir bayram olduğunu deyib.

Məktəbin müəllimi Vəsilə Umudova xalqımızın bu günədək yaşatdığı, qoruyub gələcək nəsillərə ötürdüyü, müqəddəsləşdirdiyi bu bayramın dünyanın yaranma sirlərini, gələcəyə, xoşbəxtliyə ümidini özündə əks etdirdiyini bildirib.

Bayram şənliyində Novruzun personajları Keçəl və Kosanın məzəli oyunları, Bahar qızın gəlişi tədbir iştirakçılarının marağına səbəb olub.

Şagirdlər gəlişi ilə baharın təravətli nəfəsini gətirən Novruz bayramına aid mahnılar oxuyub, şeirlər söyləyib, maraqlı səhnəciklər göstəriblər.