Fövqəladə Hallar Nazirliyinin (FHN) Dövlət Yanğın Nəzarəti İdarəsinin mütəxəssisləri tərəfindən Saatlı rayonunun ümumtəhsil məktəblərində təsərrüfat müdirləri, ocaqçı və gözətçi vəzifələrində çalışanlara “Təhlükəsizlik qaydalarına əməl edilməsi” mövzusunda maarifləndirmə tədbiri keçirilib.

Tədbirin keçirilməsində məqsəd ümumtəhsil məktəblərində çalışanlara fövqəladə hallar, o cümlədən yanğın zamanı davranış qaydalarının aşılanması olub.

Mütəxəssislər tərəfindən görüş zamanı iştirakçılara mövzu ilə bağlı ətraflı məlumat verilib, FHN-in "101", "112" qaynar telefon xəttlərinin təyinatı izah olunub, ilkin yanğınsöndürmə vasitələrindən istifadə qaydaları nümayiş etdirilib.

Qeyd edək ki, bu cür tədbirlər Dövlət Yanğın Nəzarəti İdarəsinin mütəxəssisləri tərəfindən Mil-Muğan Regional Təhsil İdarəsinin tabeliyində fəaliyyət göstərən ümumi təhsil müəssisələrində mütəmadi olaraq təşkil olunur.