Sabirabad şəhər 5 nömrəli məktəbdə keçirilən tədbirdə Mil-Muğan Regional Təhsil İdarəsinin müdiri Rəşad Musayev iştirak edib.

Tədbirdə Azərbaycan Respublikasının Dövlət Himni səsləndirildikdən sonra torpaqlarımızın azadlığı uğrunda şəhid olan qəhrəman övladlarımızın əziz xatirəsi bir dəqiqəlik sükutla yad edilib.

Tədbirdə çıxış edən Rəşad Musayev müəllimləri, şagirdləri “Zəfər Günü” bayramı münasibətilə təbrik edərək, Ali Baş Komandan cənab İlham Əliyevin rəhbərliyi ilə rəşadətli Ordumuzun 44 günlük Vətən müharibəsində düşmən üzərində qazandığı möhtəşəm Zəfərdən danışıb. Qələbənin Azərbaycan tarixinin ən şanlı səhifəsi olaraq gələcək nəsillərin xatirəsində əbədi yaşayacağını bildirib. O, Azərbaycanın üçrəngli bayrağının azad edilmiş ərazilərimizdə ucaldılaraq qürurla dalğalandığını deyərək, xalqımızın doğma Qarabağımızın azadlığı uğrunda aparılmış, hər günü böyük bir qəhrəmanlıq dastanı olan Vətən müharibəsində Böyük Qələbənin üçüncü ildönümünü müzəffər xalq, qalib dövlət kimi yüksək qürur hissi ilə təntənə ilə qeyd etdiyini bildirib.

Ali Baş Komandan cənab İlham Əliyevin rəhbərliyi ilə Azərbaycan ordusunun Qarabağdakı separatçı rejimə və qeyri-qanuni erməni silahlı qüvvələrinə qarşı apardığı 24 saata yaxın lokal xarakterli antiterror əməliyyatının növbəti dəfə Azərbaycan dövlətinin möhtəşəm Zəfəri ilə nəticələndiyini qeyd edən idarə müdiri, Prezident İlham Əliyevin oktyabrın 15-də Xankəndi şəhərində Azərbaycan Respublikasının Dövlət Bayrağını ucaltığını tədbir iştirakçılarının diqqətinə çatdırıb.

Tədbir məktəbin şagirdləri tərəfindən hazırlanmış bədii hissə ilə davam edib.