Beyləqan şəhəri 8 nömrəli tam orta məktəbdə Beyləqan və İmişli rayonları üzrə 2022-2023-cü tədris ilində təyin olunan direktorların illik hesabatları dinlənilib.

Məktəb direktorlarının hesabatları dinlənildikdən sonra Mil-Muğan Regional Təhsil İdarəsinin Tədrisin Keyfiyyət Sektorunun müdiri Mahir Zahidov çıxış edərək hesabatların dinlənilməsinin ümumi təhsildə qarşıya qoyulan hədəflərə çatmaqda mühüm rol oynadığını və bu işin mütəmadi davam etdiriləcəyini bildirib. Ötən dərs ilinin nəticələrinin təhlili zamanı qarşıya çıxan məsələlərə diqqətin artırılmasının əhəmiyyətindən danışıb.

Hesabatların dinlənilməsinin əsas məqsədinin ümumi təhsil məktəblərində təlim-tərbiyə prosesinin təşkili, məktəblərin fəaliyyətində səmərəli idarəetmənin rolunun artırılması, məktəblərdə sağlam və yaradıcı mühitin təmin olunması üçün sistemli işlərin aparılması, sağlam rəqabətin yaranması, digər müvafiq məsələlərin müzakirəsi və təhsil müəssisələrində tədrisin keyfiyyətcə yeni mərhələyə qədəm qoymasını təmin etməkdən ibarət olduğunu bildirib.

Sonda hesabatlarla əlaqədar direktorlara müvafiq tövsiyələr verilib, onları maraqlandıran suallar cavablandırılıb və qarşılıqlı fikir mübadiləsi aparılıb.