Mil-Muğan Regional Təhsil İdarəsi üzrə əvvəlki illərdə ümumi təhsil müəssisələrinin ümumi orta (IX) və tam orta (XI) təhsil səviyyəsi üzrə başa vura bilməyən şəxslər üçün eksternat qaydasında aralıq imtahanı keçirilib.

İmişli şəhər 7 nömrəli tam orta məktəbdə keçirilən aralıq imtahanında Beyləqan və İmişli rayonları üzrə iştirak edən eksternlər ümumi orta (IX) və tam orta (XI) təhsil səviyyəsi üzrə hər birində 10 sual olmaqla müvafiq fənnlər üzrə imtahan veriblər.

Qeyd edək ki, eksternat təhsilalma formasının tətbiqi müxtəlif səbəblərdən ümumi orta və tam orta təhsil səviyyələrini başa vura bilməyən şəxslərə həmin səviyyələr üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır.

Eksternat imtahanlarında uğur qazanmış şəxslər ümumi orta və tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən keçirilən buraxılış imtahanlarında iştirak etmək hüququ qazanacaqlar.

Eksternat imtahanlarında iştirak etmək üçün Beyləqan və İmişli rayonları üzrə 158 nəfər qeydiyyatdan keçmişdir.