Mil-Muğan Regional Təhsil İdarəsinin tabeliyində fəaliyyət göstərən ümumi təhsil müəssisələrində çalışan muəllimlər arasında Ümummilli lider Heydər Əliyevin anadan olmasının 100 illiyinə həsr olunmuş bilik yarışının region turu keçirilib.

Yarışın rəsmi hissəsi Azərbaycan Respublikasının Dövlət Himninin səsləndirilməsi, Ümummilli lider Heydər Əliyevin və ölkəmizin ərazi bütövlüyü uğrunda canından keçmiş şəhidlərimizin əziz xatirəsinin bir dəqiqəlik sükutla yad olunması ilə başlayıb.

Bilik yarışının rayon turunda Beyləqan, İmişli, Saatlı və Sabirabad rayonları üzrə  I, II, və III yeri tutan komandalar İmişli şəhər Uşaq-Gənclər Şahmat-İdman məktəbində yarışın region (final) turunda iştirak ediblər.

Mil-Muğan RTİ-nin Tədrisin Keyfiyyəti sektorunun müdiri Mahir Zahidov çıxışında qeyd edib ki, Ümummilli lider Heydər Əliyevin gənclərə olan yüksək etimadının nəticəsidir ki, bu gün ölkəmizdə gənclər siyasəti mahiyyət və keyfiyyətcə yeni mərhələsini yaşayır. Azərbaycan gəncliyi Azərbaycan Respublikasının Prezidenti İlham Əliyevin onlara göstərilən xüsusi diqqət və qayğısını hər zaman hiss edir və öz məsuliyyətini dərk edir.

O, bilik yarışlarının keçirilməsində əsas məqsədin Ümummilli lider Heydər Əliyevin anadan olmasının 100-cü ildönümünün qeyd edilməsi, əbədi xatirəsinin yad edilməsi, müəllimlər tərəfindən Heydər Əliyev irsinin daha da dərindən öyrənilməsi, ideyalarının təbliğ edilməsi və müəllimlər arasında rəqabət hissinin artırılmasından ibarət olduğunu bildirilib. Sonra yarışın qaydalarını və münsiflər heyətinin tərkibini elan edib.

Qaydalara uyğun olaraq bilik yarışında Ümummilli lider Heydər Əliyevin həyat və siyasi fəaliyyətini əks etdirən - 6, məntiqi təfəkkür, Azərbaycan dili, ədəbiyyat, tarix, coğrafiya, riyaziyyat və təbiət fənlərini əhatə edən - 6 və ümumi dünya gorüşü əhatə edən - 6 sual olmaqla ümümilikdə 18 sualı cavablandırmalı olublar. Hər bir sualın cavablandırılması üçün isə bir dəqiqə vaxt müəyyənləşdirilib.

Maraqlı və gərgin mübarizə şəraitində keçən yarışın nəticəsinə əsasən İmişli şəhər 3 nömrəli məktəbin “Erudit” komandası 1-ci yeri, Beyləqan rayonu 1-ci Aşıqlı kənd məktəbinin “Lion” komandası 2-ci yeri, İmişli rayonu Məzrəli kənd məktəbinin “Məzrəli 1953” komandası isə 3-cü yeri tutub.