Mil-Muğan Regional Təhsil İdarəsinin təşkilatçılığı ilə İmişli rayon Heydər Əliyev Mərkəzində Ümummilli lider Heydər Əliyevin anadan olmasının 100 illiyinə və Prezident cənab İlham Əliyevin dövlət başçısı kimi 20 illik fəaliyyətinə və RTİ-nin illik hesabatına həsr olunmuş tədbir keçirilib.

Tədbirdə Mil-Muğan RTİ-nin müdiri Rəşad Musayev, YAP İmişli rayon təşkilatının sədri Səfa Ağayev, İmişli RİH-nin İctimai-siyasi və humanitar məsələlər şöbəsinin müdir müavini Rüfət Muradov, Mil-Muğan Regional Gənclər və İdman İdarəsinin müdiri Nadir Quliyev,  Mil-Muğan Regional Mədəniyyət İdarəsinin müdiri Faiq Xudanlı, Mil-Muğan Regional Məşğulluq filialının müdiri İlham Quliyev, Sabirabd, Saatlı, İmişli, Beyləqan rayon təhsil sektorlarının rəhbərliyi, məktəbəqədər, ümumtəhsil, məktəbdənkənar müəssisələrin rəhbərləri, müəllimlər və şagirdlər iştirak ediblər.

Əvvəlcə tədbir iştirakçıları Ümummilli lider Heydər Əliyevin 100 illik yubileyinə həsr olunmuş Mil-Muğan RTİ-nin tabeliyində fəaliyyət göstərən ümumi təhsil müəssisələrinin şagirdləri arasında keçirilmiş rəsm müsabiqəsində şagirdlər tərəfindən çəkilmiş rəsmlərə baxış keçirilib, onların fərqli mövzularda çəkdikləri rəsmlər haqqında müzakirələr aparıblar. 

Tədbir Azərbaycan Respublikasının Dövlət Himninin səsləndirilməsi, Ümummilli lider Heydər Əliyevin və ölkəmizin ərazi bütövlüyü uğrunda canından keçmiş şəhidlərimizin əziz xatirəsinin bir dəqiqəlik sükutla yad olunması ilə başlayıb.

Tədbirdə çıxış edən Rəşad Musayev müasir və müstəqil Azərbaycanın qurucusu, Ümummilli lider Heydər Əliyevin dövlətçiliyimizin əsasının qoyulması və qorunması istiqamətində çoxşaxəli və fədakar fəaliyyətindən danışıb. Müstəqilliyimizin bərpa olunmasından sonra Ermənistanın Azərbaycana qarşı hərbi təcavüzü nəticəsində yaranmış çətin vəziyyət, qaçqın və məcburi köçkün problemi, iqtisadi və sosial böhrana baxmayaraq, Ümummilli liderin, özünün dediyi kimi, Azərbaycanın müstəqilliyini əbədi, daimi və dönməz etməyə nail olduğunu bildirib.

Mil-Muğan RTİ-nin fəaliyyətə başladığı dövrdən bəri təhsil sahəsində müsbət dinamika müşahidə olunduğunu və bir sıra əsaslı nailiyyətlər əldə edildiyini bildirən Rəşad Musayev təhsilin inkişafı ilə bağlı həyata keçirilən kompleks tədbirlərdən, müasir standartlara uyğun yeni məktəb binalarının inşa edilməsindən və bu istiqamətdə görülən işlərdən danışıb.

O, istedadlı uşaqlarla iş sahəsində görülmüş işlərdən, fənn olimpiadalarında və müxtəlif bilik yarışlarında, müsabiqələrdə şagirdlərin qazandıqları uğurlardan, müəllimlərin sertifikatlaşdırma prosesində göstərdikləri nəticələrindən danışıb.

Rəşad Musayev çıxışının sonunda tədbir iştirakçılarını 31 dekabr Dünya Azərbaycanlıların Həmrəylik Günü və Yeni il bayramı münasibətilə təbrik edərək onlara firavan həyat, ailə səadəti və xoşbəxtlik arzulayıb.

Tədbirdə çıxış edənlər Ulu Öndər Heydər Əliyevin çoxşaxəli fəaliyyətindən, Azərbaycanın inkişafı və milli dövlətçiliyin gücləndirilməsi istiqamətində misilsiz tarixi xidmətlərindən, böyük xilaskarlıq missiyasından söhbət açıblar. Ulu öndər Heydər Əliyevin siyasi kursunun onun varisi Azərbaycan Prezidenti İlham Əliyev tərəfindən uğurla davam etdirildiyini, ata vəsiyyətini yerinə yetirən Prezident İlham Əliyevin rəhbərliyi altında Ermənistanın işğalçılıq siyasətinə son qoyulmasından, torpaqlarımızın azad edilməsinidən danışıblar.

Sonra Elm və Təhsil Nazirliyinin “Azərbaycan Respublikası qabaqcıl təhsil işçisi” döş nişanı və Fəxri Fərmanı ilə təltif olunmuş müəllimlər, sertifikasiyada ən yüksək nəticə göstərmiş müəllimlər, fənn olimpiadalarında və müxtəlif bilik yarışlarında qalib olmuş şagirdlər, “SAF 2023” - Beynəlxalq STEAM Azərbaycan Festivalı qaliblərinin müəllimləri, Ümummilli lider Heydər Əliyevin anadan olmasının 100 illiyinə həsr olunmuş bilik yarışının qalibi olmuş müəllimlər Mil-Muğan RTİ-nin fəxri fərmanı, diplomları və qiymətli hədiyyələrlə təltif olunublar.

Sonda şagirdlərin ifasında musiqilər və şeir nümunələri maraqla dinlənilib, rəqslər izlənilib.