Beyləqan rayonu üzrə ötən il sertifikasiyanın test mərhələsində uğursuz nəticə göstərən müəllimlərə dəstək məqsədilə görüş keçirilib.

Görüşdə sertifikatlaşdırma prosesinin imtahan mərhələsinin məzmunundan, müəllimlər üçün əlavə dəstək tədbirlərindən, metodika və pedaqogika üzrə məzmun sahələri, bölmələr və mövzular barədə ətraflı məlumat verilib. Mil-Muğan Regional Təhsil İdarəsi tərəfindən təkrar sertifikasiyada iştirak edəcək müəllimlərə dəstək göstərmək məqsədilə ibtidai təhsil səviyyəsində Azərbaycan dili və riyaziyyat, Azərbaycan dili və ədəbiyyatı fənlərinin məzmunu, metodika və İKT bacarıqlarını inkişaf etdirməklə bağlı təlimlərin təşkil ediləcəyi bildirilib.

Sertifikatlaşmanın hər iki mərhələsində uğur qazanmayan müəllimlərin işə qəbulu üzrə müsabiqədə - MİQ imtahanlarında iştirak edə biləcəkləri qeyd olunub.

Sonda sertifikatlaşdırma ilə bağlı müəllimləri maraqlandıran suallar cavablandırılıb.