Əsgərlərin asudə vaxtlarının səmərəli keçirməsi üçün Mil-Muğan Regional Təhsil İdarəsi tərəfindən "Hər əsgərə bir kitab hədiyyə" layihəsi həyata keçirilib.

Mil-Muğan RTİ-nin tabeliyində fəaliyyət göstərən ümumi təhsil müəssisələrində təhsil alan və əsgərlərə könüllü olaraq kitab hədiyyə etmək istəyən şagirdlər hədiyyə etdikləri kitablara ürək sözlərini yazaraq oxuduğu təhsil müəssisəsinə təqdim ediblər.

Layihə çərçivəsində məktəblərdən toplanmış kitablar "14 fevral-Beynəlxalq Kitab Bağışlama Günü" münasibətilə Tərtər rayonunda yerləşən "N" saylı hərbi hissələrə bağışlanılıb.

Kitabların "N" saylı hərbi hissələrə təqdim olunmasından öncə Tərtər Rayon İcra Hakimiyyətinin qarşısında “Zəfərə aparan yol” layihəsi çərçivəsində təşkil olunmuş sərgidə nümayiş olunub.

Qeyd edək ki, "Hər əsgərə bir kitab hədiyyə" layihəsi çərçivəsində hərbi hissələrə bağışlanmaq üçün Mil-Muğan RTİ-nin tabeliyində fəaliyyət göstərən ümumi təhsil müəssisələrində 4 minə yaxın bədii kitab toplanıb.