Sabirabad şəhəri 6 nömrəli tam orta məktəbdə şəhidlərin xatirəsini əbədiləşdirmək üçün yaradılmış “Şəhidlər guşəsi”nin açılış mərasimi keçirilib.

Tədbirə Dövlət Himninin səsləndirilməsi, Vətən uğrunda şəhid olanların xatirəsinin bir dəqiqəlik sükutla yad edilməsi ilə başlanılıb.

Tədbirdə çıxış edənlər “Şəhidlər guşəsi”nin yaradılmasının Vətən uğrunda şəhid olanlara sonsuz ehtiramın kiçik bir nümunəsi olduğunu bildiriblər. Müstəqilliyimiz və torpaqlarımızın bütövlüyü uğrunda şəhid olmuş qəhrəmanların gənc nəslə örnək olduğunu, Vətən uğrunda canını qurban verən igidlərin heç zaman unudulmayacağından danışıblar. Qəhrəmanlarımızın, şəhidlərimizin başladığı mübarizə yolunun qələbə ilə başa çatmasının hər bir azərbaycanlının qürur yeri olduğunu qeyd ediblər.

Azərbaycanın müstəqilliyi və ərazi bütövlüyü uğrunda qəhrəmanlıq göstərmiş Vətən övladlarının döyüş yolunun öyrənilməsi, canlarından keçmiş igidlərin xatirəsinin əbədiləşdirilməsi və onların şücaətinin təbliğində təhsil müəssisələrinin böyük rolu olduğunu bildiriblər.

Tədbirdə çıxış edən şəhid ana və ataları göstərilən diqqətə, qayğıya görə təşəkkürlərini bildiriblər.

Daha sonra tədbirdə məktəblilərin ifasında vətənpərvərlik mövzusunda ədəbi-bədii kompozisiyalar nümayiş olunub.