Beyləqan və İmişli rayonlarının ümumi təhsil müəssisələrinin IV siniflərində təşkil olunacaq monitorinqlə bağlı görüşlər keçirilib.

Görüşlərdə Mil-Muğan Regional Təhsil İdarəsinin Tədrisin keyfiyyəti sektorunun müdiri Mahir Zahidov və IV siniflərdə dərs deyən müəllimlər iştirak ediblər.

Görüşlərdə Mahir Zahidov IV siniflərdə müəllimlərin tədrisin keyfiyyətinin artırılması ilə bağlı görülmüş işlərin, "Çərçivə sənədi" əsasında məktəblərdə məqsədyönlü fəaliyyətin nəticələrinin təhlil olunmasının və şagirdlərin monitorinqə psixoloji cəhətdən də hazırlığının əhəmiyyətli olduğunu vurğulayıb.

Monitorinqin əsas məqsədinin şagird nailiyyətlərinin yaxşılaşdırılması, IV sinfin sonunda şagirdlərdə müvafiq standartlar üzrə bilik və bacarıqların hansı səviyyədə formalaşdığının müəyyən edilməsi, ibtidai təhsil səviyyəsində keyfiyyətin artırılması istiqamətində tədbirlərin görülməsindən ibarət olduğunu bildirib.

Monitorinqin nəticələri cari ildə IV sinfi bitirəcək təhsilalanların tədris dili və riyaziyyat fənlərindən ölkə üzrə reytinq göstəricisini müəyyən etməyə, həmçinin bu fənlər üzrə həmin şagirdlərin hazırlıq vəziyyətini öz yaşıdları ilə müqayisə etməyə imkan yaradacaq. Monitorinqin nəticəsi şagirdlərin summativ qiymətləndirmə ballarına, eləcə də onların sinifdən-sinfə keçmələrinə təsir göstərmədiyini görüş iştirakçılarının nəzərinə çatdırıb.

Görüşlərdə müəllimlərin monitorinqlə bağlı maraqlandıran suallar cavablandırılıb.