Saatlı rayonunda ümumi təhsil məktəblərinin şagirdləri arasında şəhidlərin xatirəsinə həsr olunmuş mini-futbol turnirinin açılış mərasimi keçirilib.

Turnir Azərbaycan Respublikasının Dövlət himninin oxunması və şəhidlərin xatirəsinin bir dəqiqəlik sükutla yad edilməsi ilə başlanılıb.

Açılış mərasimində Saatlı rayon İcra Hakimiyyəti başçısının müavini Mehriban Ağayeva, Mil-Muğan RTİ-nin müdir müavini Rabil Şahbazov, şəhid ailələri, Saatlı RİH-nin Vətən müharibəsi iştirakçıları və şəhid ailələri ilə işin təşkili şöbəsinin müdiri Fərhar Mürsəlov, Uşaq və ailələrə dəstək mərkəzinin müdiri Aida İbrahimova və məktəb direktorları iştirak ediblər.

Açılış mərasimində çıxış edənlər turnir haqqında ətraflı məlumat veriblər, şəhidlərin xatirəsinin əziz tutulduğunu, eləcə də şəhid ailələrinin problemlərinin həlli istiqamətində dəyərli işlər görüldüyünü qeyd ediblər. Yüksək amal uğrunda canını fəda edən şəhidlərin xatirəsinə hər zaman diqqətlə yanaşmaq hamımızın mənəvi borcumuz olduğunu bildiriblər.

Regionda idman yarışlarının, idmanın kütləviliyinin artırılması məqsədilə tədbirlərin görülməsindən, idmanın əsas istiqamətlərini müəyyən etmək üçün bu sahədə işlərin ardıcıl olaraq aparılmasından danışıblar. Keçirilən bu kimi tədbirlərin yeniyetmə və gənclərin fiziki inkişafı ilə yanaşı, onların vətənpərvərlik tərbiyəsinin inkişafında da böyük önəm daşıdığı vurğulanıb.

Turnirin keçirilməsində məqsəd rayon şagirdlərin asudə vaxtlarının düzgun və səmərəli təşkili, Qarabağ döyüşlərində həlak olmuş şəhidlərimizin xatirəsini yad etmək, onların ailələrinə mənəvi dəstək olmaq, gənclərə vətənpərvərlik hisslərinin aşılanması və sağlam həyat tərzinin təbliğ olunmasıdır.