Görüşdə Saatlı Rayon İcra Hakimiyyətinin başçısı Elmir Bağırov, Mil-Muğan Regional Təhsil İdarəsinin müdiri Rəşad Musayev, Saatlı rayonu təhsil sektorunun müdiri Günay Sultanova, məktəb direktorları, müəllimlər və valideynlər iştirak ediblər.

Tədbirdə çıxış edənlər məzunları əldə etdikləri bu böyük nailiyyət münasibətilə təbrik edib, onlara təhsillərində uğurlar arzulayıblar. Qeyd ediblər ki, ölkəmizdə əsası ümummilli lider Heydər Əliyev tərəfindən qoyulan və bu gün Prezident cənab İlham Əliyevin uğurla davam etdirdiyi milli təhsil quruculuğu və islahatları öz töhfələrini verməkdədir. Yeni məktəb binalarının inşası, təhsil müəssisələrinin maddi-tədris bazalarının möhkəmləndirilməsi, informasiya-kommunikasiya texnologiyaları ilə təmin edilməsi təhsilin keyfiyyətinə müsbət təsirlərini göstərir.

Çıxış edən məzunlar ölkəmizdə təhsilin inkişafına və gənclərə göstərilən diqqət və qayğıdan danışaraq, dövlətimizin başçısına minnətdarlıqlarını bildiriblər. Onlar Vətənimiz və xalqımız üçün layiqli vətəndaş olmağa çalışacaqlarını qeyd ediblər.

Sonda məzunlara qiymətli hədiyyələr və Saatlı RİH başçısının fəxri fərmanı təqdim olunub. Ümumi təhsili xüsusi nailiyyətlərlə başa vurduqları üçün Azərbaycan Respublikasının elm və təhsil nazirinin əmrinə əsasən qızıl nişanla təltif olunmuş iki tələbəyə rayon icra hakimiyyətinin başçısı tərəfindən qızıl nişanlar təqdim edilib.