İmişli rayonunun Qızılkənd və Aranlı kənd 1 nömrəli tam orta məktəblərinin pedaqoji kollektivləri ilə "Təhsilverənlərin etik davranış Qaydaları" ilə bağlı görüş keçirilib.

Görüşdə iştirak edən İmişli rayon təhsil sektorunun baş məsləhətçisi Vahir Tağıyev yeni qaydaların 15 may 2024- cü il tarixdə qəbul edilməsinin zəruriliyi, yeniliklər və bu qaydaların təhsil müəssisələrində tətbiqi və ona nəzarət edilməsi barədə ətraflı məlumat verib.

O, bildirib ki, ölkəmizin təhsil həyatında baş verən yeniliklər, Elm və Təhsil Nazirliyinin məsuliyyət dairəsinin genişləndirilməsi qaydaların da dəyişməsinə səbəb olub. Yeni qaydalar əvvəlkindən fərqli olaraq ümumi təhsil müəssisələrində çalışan təhsilverənlərlə yanaşı, məktəbəqədər təhsil müəssisələrinin tərbiyəçi-müəllimlərin, ali məktəb müəllimlərinin, peşə məktəblərində çalışan istehsalat təlimi ustalarının da daxil olmaları ilə daha geniş sahəni əhatə edir. Yeni qaydada “Təhsilverənlərin xidməti davranışı” adlı bölmədə həyata keçirilməli olan tələblər daha konkret şəkildə və ardıcıllıqla göstərilib. Qaydaların 4.3. bəndində göstərilir ki, təhsilverən sosial media hesablarında onun və işlədiyi müəssisənin adına xələl gətirən, nüfuzunu aşağı salan audio və videomateriallar, təsvirlər paylaşmamalıdır. Ümumilikdə yeni qaydalar daha çox nizam-intizamın gücləndirilməsi, məsuliyyətin artırılması, təhsil müəssisələrində daha sağlam mühitin formalaşmasına kömək etməyi bir məqsəd kimi qarşıya qoyur.

Vahid Tağıyev yeni qaydalarda əks olunan yeniliklərin bu baxımdan çox əhəmiyyətli olduğunu qeyd edərək bəzi məqamları iştirakçıların diqqətinə çatdırıb:

-Təhsilverən özünün bilik və bacarıqlarını inkişaf etdirməli, təhsilalanların nailiyyətlərini yüksəltmək məqsədilə davamlı peşəkar inkişafını təmin etməlidir;

-Təhsilverən korrupsiyaya imkan verməməli, təhsilalanları korrupsiyaya qarşı barışmazlıq ruhunda yetişdirməlidir;

-Təhsilverən nitqində Azərbaycan ədəbi dilinin normalarına riayət etməlidir;

-Təhsilverən təhsilalanların rifahı və öyrənməsi üçün dəstəkləyici, inkişafetdirici, sağlam və təhlükəsiz mühitin qurulmasını təmin etməlidir;

Sonda bir sıra aktual məsələlər ətrafında fikir mübadiləsi aparılıb, görüş iştirakçılarını maraqlandıran suallar cavablandırılıb.