Elm və Təhsil Nazirliyinin təşəbbüsü, Məktəbəqədər və Ümumi Təhsil üzrə Dövlət Agentliyinin təşkilatçılığı ilə cari ildə ümumtəhsil məktəblərinin şagirdləri arasında “Zəfər” respublika yaradıcılıq festival-müsabiqəsi keçirilib.

Festival-müsabiqənin keçirilməsində məqsəd Vətən müharibəsində şəhid olmuş qəhrəmanlarımızın əziz xatirəsinin ehtiramla yad edilməsi, Azərbaycan Ordusunun Vətən müharibəsindəki şanlı qələbəsi və dünya hərb tarixində açdığı yeni səhifə ilə bağlı uşaq və gənclərin maarifləndirilməsi, həmçinin ölkəmizin işğal altında olan ərazilərinin azad edilməsində ordumuzun və dövlətimizin əldə etdiyi nailiyyətlərin, qazanılan zəfərin bütün türk dünyasının qələbəsi olduğunu gənc nəslə çatdırılması olub.

3 mərhələdə (rayon (şəhər), zona, final) keçirilmiş festival-müsabiqədə şagirdlər üç yaş qrupunda (6-10 yaş, 11-14 yaş və 15-17 yaş) iştirak ediblər. 

Beyləqan şəhər 1 nömrəli tam orta məktəbin şagirdi Elsevər Məhərrəmli  (11-14 yaş) “Zərb alətləri” nominasiyasında I yerin, İmişli rayonu Bəhrəmtəpə qəsəbə tam orta məktəbin şagirdi Yusif Dəmirli (6-10 yaş) “Muğam və təsniflər” nominasiyasında III yerin, Beyləqan rayonu Əlinəzərli kənd 1 nömrəli tam orta məktəbin şagirdi Ülvi Əlizadə (11-14 yaş) “Xalq çalğı alətləri” nominasiyasında III yerin, Beyləqan şəhər humanitar fənlər təmayüllü liseyin (8 nömrəli məktəb) şagirdləri (11-14 yaş) “Xor” nominasiyasında III yerin qalibi olublar.

Şagirdlərimizi təbrik edir və uğurlar arzulayırıq!