Görüşdə Mil-Muğan Regional Təhsil İdarəsinin müdir müavini Rabil Şahbazov, İnzibati təşkilat sektorunun baş məsləhətçisi Ağamir Məmmədov və Beyləqan rayon təhsil sektorunun müdiri Elvin Abbasov iştirak ediblər.

Görüşdə çıxış edən Rabil Şahbazov ümumi təhsil müəssisələrində şagird təhlükəsizliyinin gücləndirilməsi, daxili nizam-intizam qaydalarına əməl olunmasına nəzarətin artırılması, korrupsiya hüquqpozmalarına qarşı mübarizə vasitələri, DİM-in "Şagird-məzun" sisteminin işlənilməsi və Ümumi Təhsil Müəssisələrinin İnformasiya Sistemi (UTİS) proqramında məlumatların müntəzəm yenilənməsi ilə bağlı danışıb.

O, korrupsiyanın mahiyyəti, anlayışı, korrupsiyaya gətirib çıxaran amillər barədə danışaraq, bir neçə təhsil müəssisələrində keçirilmiş monitorinqlər zamanı təhsil sənədlərinin verilməsi, saxlanılması, müvafiq fənlərin yarımqruplara bölünməsində, dərsdənkənar məşğələlərin təşkilində nöqsanların aşkar edildiyini bildirib. Aşkar olunmuş nöqsanlara uyğun müvafiq intizam tənbehlərinin tətbiq edilməsi barədə, həmçinin şəffaflığın təmin olunması istiqmətində aparıcı elektron hökumət resursları barədə ətraflı məlumat verib. “Ümumi təhsil müəssisələrində şagird davranış qaydaları”na əməl edilməsi, məktəbə gətirilməsi qadağan olunan əşya və ləvazimatlar haqqında maarifləndirmə işlərinin aparılması, dərsə davamiyyət və digər müvafiq məsələlərlə bağlı tövsiyələrini bildirib.

Görüşdə Ağamir Məmmədov və Elvin Abbasov çıxış edərək “Şagird-məzun” dövlət elektron məlumat sisteminin, UTİS məlumat bazasının işlənilərək məlumatların vaxtında daxil edilməsi və digər məsələlər haqqında danışıblar.

Sonda məsələlər ətrafında müzakirələr aparılıb, suallar cavablandırılıb.