Mil- Muğan Regional Təhsil İdarəsinin Tədrisin Keyfiyyət sektorunun müdiri Mahir Zahidov Beyləqan rayonu Milabad qəsəbəsində və İmişli rayonu Oruclu kəndində təşkil olunmuş "Ailə tipli təlim qrupları"nda olub.

Mahir Zahidov təlim qruplarında uşaqlar üçün yaradılmış şəraitlə və tədris prosesi ilə yaxından tanış olaraq müvafiq tövsiyələrini verib.

"Ailə tipli təlim qrupları" ilə bağlı Elm və Təhsil Nazirliyi tərəfindən elan olunmuş qrant layihədə Mil-Muğan RTİ-nin tabeliyində fəaliyyət göstərən ümumtəhsil müəssisələrindən 4 müəssisə, Beyləqan rayonu Birinci Şahsevən kənd 3 nömrəli tam orta, İmişli şəhər 3 nömrəli tam orta, Saatlı rayonu Simada kənd tam orta və Sabirabad rayonu Zal Qaraağac kənd tam orta ümumtəhsil məktəbləri qalib olmuşdur.

Belə ki, qalib olmuş layihələrdə bir ailədə 8 nəfər uşaq olmaqla Beyləqan rayonu Birinci Şahsevən kənd 3 nömrəli tam orta ümumtəhsil məktəbi Milabad qəsəbəsində, İmişli şəhər 3 nömrəli tam orta ümumtəhsil məktəbi Oruclu kəndində, Saatlı rayonu Simada kənd tam orta ümumtəhsil məktəbi Soltanabad kəndində, Sabirabad rayonu Zal Qaraağac kənd tam orta ümumtəhsil məktəbi Cəngən, Çiçəkli və Qaraqaşlı kəndlərində ümumilikdə 6 ailədə 48 nəfər məktəbəqədər təhsildən kənarda qalmış uşaq "Ailə tipli təlim qrupları"na cəlb edilib.

"Ailə tipli təlim qrupları"na məktəbəqədər təhsildən kənarda qalmış 3 - 4 yaşlı uşaqlar ev şəraitində təşkil olunan kiçik qruplarda, onların yaş xüsusiyyətlərinə uyğun proqram əsasında tədris prosesinə cəlb olunurlar. Ailədə 1 və ya 2 məktəbəqədər yaşlı uşaq olduqda bu qruplar həmin ailədə təşkil edilərək, cəlb olunmuş uşaqların intelektual, fiziki və mənəvi inkşafı üçün şərait yaradılır. Təlim prosesi oyuncaqlar, kitablar və digər vasitələrlə zənginləşdirilərək uşaqların intelektual, fiziki və mənəvi inkşafına xidmət edir.