Sabirabad rayonu üzrə ötən il sertifikasiyanın test mərhələsində uğursuz nəticə göstərən riyaziyyat və xarici dil müəllimlərinə dəstək məqsədilə Sabirabad şəhəri Nizami Gəncəvi adına 5 nömrəli tam orta ümumtəhsil məktəbində görüş keçirilib.

Görüşdə iştirak edən Mil-Muğan Regional Təhsil İdarəsinin Tədrisin keyfiyyəti sektorunun müdiri Mahir Zahidov sertifikatlaşdırma prosesinin imtahan mərhələsinin məzmunundan, müəllimlər üçün əlavə dəstək tədbirlərindən, metodika və pedaqogika üzrə məzmun sahələri, bölmələr və mövzular barədə ətraflı məlumat verib.

Müəllimlərin sertifikatlaşdırılması prosesinin təhsilin keyfiyyət göstəricilərinə, həmçinin sertifikasiya nəticəsinin təhsilverənlərin karyera inkişafına və əməyinin stimullaşdırılmasına müsbət təsirləri barədə danışıb.

Təkrar sertifikasiyada iştirak edəcək müəllimlərə dəstək göstərmək məqsədilə Mil-Muğan Regional Təhsil İdarəsi tərəfindən riyaziyyat və xarici dil fənlərinin məzmunu, metodika və İKT bacarıqlarını inkişaf etdirməklə bağlı təlimlərin təşkil ediləcəyini bildirib. Sertifikatlaşmanın test və müsahibə mərhələsində uğur qazanmayan müəllimlərin işə qəbulu üzrə müsabiqədə (MİQ) imtahanlarında iştirak edə biləcəklərini qeyd edib.

Sonda imtahanın təşkili qaydaları ilə bağlı müəllimləri maraqlandıran suallar cavablandırılıb.