“Müasir metodist” müsabiqəsi ilə bağlı keçirilən görüşdə sertifikasiya balı 51 və 51 baldan yuxarı olan müəllimlər iştirak ediblər.

Görüşdə iştirak edən Mil-Muğan Regional Təhsil İdarəsinin Tədrisin keyfiyyəti sektorunun müdiri Mahir Zahidov Təhsil İnstitutu tərəfindən 2025-2026-ci tədris ili üzrə ümumi təhsil müəssisələrində metodist kimi fəaliyyət göstərəcək şəxslərin seçimi üçün elan olunmuş “Müasir metodist” müsabiqəsi barəsində danışıb.

O, “Müasir metodist” layihəsinin müəllimlərin peşəkar inkişafını dəstəkləmək və məktəblərdə tədrisin keyfiyyətini inkişaf etdirmək məqsədilə həyata keçirilməsindən, layihəyə qeydiyyatın davam etməsindən, şərtləri və tələbləri barədə ətraflı məlumat verib. “Müasir metodist” layihəsi çərçivəsində metodistin məktəbin təlim ehtiyaclarını müəyyənləşdirməsi, dərsdinləmələrin aparması, müəllimlərlə əks-əlaqənin qurulması və müəllimlərin peşəkar inkişafının təmin edilməsi üçün təlimlərin, seminarların keçirilməsi fəaliyyət istiqamətlərindən danışıb.

Beyləqan şəhər Təbiət və Humanitar fənlər təmayüllü liseydə, Dünyamalılar kənd 1 nömrəli və Sabirabad şəhəri 6 nömrəli tam orta ümumtəhsil məktəblərində “Müasir metodist” layihəsinin uğurla davam etdirilməsindən, həmin məktəblərdə metodik xidmətlə bağlı görülmüş işlər barəsində ətraflı məlumat verib.

Sonda müəllimlərin fikirləri dinlənilib və onları maraqlandıran suallar cavablandırılıb.