Mil-Muğan Regional Təhsil İdarəsinin tabeliyində fəaliyyət göstərən “BilBacar”, “Cerebry” layihələri və PİSA beynəlxalq qiymətləndirmə tətbiq olunan ümumtəhsil məktəblərinin, təhsil sektorlarının rəhbərlərinin və layihənin sektorlar üzrə koordinatorlarının iştirakı ilə onlayn görüş keçirilib.

Görüşdə Mil-Muğan Regional Təhsil İdarəsinin Tədrisin keyfiyyəti sektorunun müdiri Mahir Zahidov 2024-cü ilin oktyabr ayından layihələrin hazırlıq və yarış mərhələlərində şagirdlərin iştirakından və aparılmış təhlillərdən danışıb. O, layhiələrdə ən yaxşı nəticə göstərmiş şagirdlərin və məktəblərin rəğbətləndirilməsindən, növbəti mərhələlərdə görüləcək işlərdən danışaraq, səsləndirilmiş təklifləri dinləyib və sualları cavablandırıb.

Mahir Zahidov PISA 2025 – Beynəlxalq Şagird Qiymətləndirilməsində iştirak edəcək məktəblərə tədqiqatın 2025-ci ilin may ayında keçirilməsindən və tədqiqata hazırlıq işlərinin aparılmasından danışaraq öz tövsiyyələrini verib. 

Qeyd edək ki, BilBacar müsabiqəsinin keçirilməsində məqsəd VIII, IX və X sinif şagirdlərinin məktəbdə qazandıqları bilik və bacarıqları real həyatda tətbiq etmə qabiliyyətini inkişaf etdirmək və onlara bu bilikləri gündəlik həyatda istifadə etmək vərdişi aşılamaqdır. “Cerebry” platforması isə müasir texnologiyalar vasitəsilə şagirdlərin fərdi inkişafını izləməyə və qiymətləndirməyə imkan verir. Sistem müəllimlərə şagirdlərin zəif və güclü tərəflərini müəyyən etməyə kömək edir, bununla da təlim prosesini daha effektiv və məqsədyönlü təşkil etməyə şərait yaradır.