Görüşdə rayonun ümumtəhsil məktəblərinin IV və VI siniflərində son üç ildə keçirilmiş monitorinqlərin, IX siniflərin buraxılış imtahanlarının nəticələri təhlil olunub. Məktəblər üçün konkret hədəflər müəyyənləşdirilib və bu hədəflərə çatma mexanizmləri müzakirə edilib.

Görüşdə çıxış edən Mil-Muğan Regional Təhsil İdarəsinin Tədrisin keyfiyyəti sektorunun müdiri Mahir Zahidov 2024-2025-ci tədris ili üçün məktəblərin ötən tədris ilində IV və VI siniflərin monitorinqləri, IX siniflərin buraxılış imtahan fənlərinin nəticələri üzrə təhlilləri tədbir iştirakçılarının diqqətinə çatdırıb. Nəticələrə uyğun olaraq hər məktəb üçün konkret hədəflər müəyyənləşdirilib və bu hədəflərə çatma mexanizmləri müzakirə edilib. O, hədəfləri məktəblər üzrə ümumiləşdirərək görüş iştirakçılarının diqqətinə çatdırıb və bu istiqamətdə məktəblərin məqsədyönlü fəaliyyət göstərmələri ilə bağlı tapşırıqlar verib. Vaxtaşırı məktəbdaxili monitorinqlərin keçirilməsi və monitorinqlər zamanı nəticələri zəif olan şagirdlərlə qrup şəklində müəllimlər tərəfindən işlərin aparılması tapşırılıb.

Sonda məktəb rəhbərlərinə tədrisin keyfiyyətinin artırılması ilə bağlı tapşırıqlar verilib və onların sualları cavablandırılıb.

Görüşlərin növbəti günlərdə digər rayonlar üzrə ümumtəhsil məktəblərinin rəhbərləri ilə davam etdirilməsi planlaşdırılır.